تجالوج - السيرة النبوية

 

         Panimula

1.                 Ang Arabia Bago Dumating ang Islam

2.                 Ang Handog

3.                 Ang Kapanganakan ng Sugo (SAS)

4.                 Ang Taon ng Elepante

5.                 Ang Pagbiyak ng Dibdib

6.                 Ang Pagyao ni Aminah

7.                 Ang Pagkapropeta

8.                 Ang Paglikas Sa Ethiopia

9.                 Ang Pagyakap ni ‘Umar Sa Islam

10.             Taon ng Dalamhati

11.             Ang Pagpunta Sa Ta’if

12.             Al-Isra’ wa AL-Mi’raj

13.             Ang Labanan Sa Badr

14.             Ang Pagsakop Sa Makkah

15.             Ang Pagyao ng Sugo (SAS)

16.             Ilan Sa mga Pag-uugali ng Sugo (SAS)

17.             Ilan Sa Kanyang mga Himala

18.             Ilan Sa Kanyang mga Katangian

19.             Ang Pag-aanyaya niya Sa mga hari at mga Pinuno

20.             Ang mga Napatnubayang Khaleefah

21.             Ang  mga Umawee at ‘Abbasee

Panimula

Ang papuri ay ukol kay Allah na nagwikang: “ At hindi ka Namin isinugo (O Muhammad ) kundi bilang habag sa lahat ng nilikha.” At  “ Matatagpuan ninyo sa Sugo ni Allah ang magandang huwaraan.” Ang Kapayapaan at pagpapala ay matamo ng Propeta na matapos niya ay wala ng iba pang propeta na darating.

 

Ang Aklat na ito na pinamagatang “Ang Talambuhay ng Propeta” (SAS)* ay inihahandog namin sa iyo sa layuning bigyan ka ng isang dagliang sulyap sa kanyang talambuhay, mga katangian, at mga himala. Hindi namin hinangad na magbigay  ng maraming detalye, sa halip ay nagkasya na lamang kaming ilahad ang mga mahahalagang pangyayari sa kanyang buhay. Marami na ang sumulat ng kanyang talambuhay kaya marahil ay naisulat na ito sa lahat ng pangunahing wila ng daigdig. May isa pa ngang hindi Muslim  na nagsabing isang malaking karangalan ang sumulat ng talambuhay ni Muhammad (SAS). Bilang mga Muslim, ang aming hangad sa pagsulat nito ay hindi lamang para sa karangalang  sumulat ng kauna-unahang aklat ng talambuhay ni Propeta Muhammad (SAS) sa wikang Tagalog kundi ang makapaglingkod sa sambayanang Muslim. Dalangin namin kay Allah na nawa’y  maging kapaki-pakinabang ang aklat na ito. Tunay na siya ang dumidinig at tumutugon sa mga panalangin.

 

 

Ang  Arabia Bago Dumating ang Islam

 Paganismo ang siyang umiiral na relihiyon sa mga Arabiano noon. Ang pagkakayakap nila sa Paganismo  na salungat sa matuwid na pananampalataya  ang dahilan kung kaya binansagan ang kapanahunan  nila  na Al-Jaahiliyah – ang Panahon ng Kamangmangan. Ang pinakabantog sa mga diyus-diyosan  na kanilang sinasamba  maliban pa kay  Allah  na tunay na Diyos ay sina Al-Lat, Al’Uzza , at Hubal. Ngunit mayroon  ding mga Arabiano na yumakap sa Judaismo, Kristiyanismo at Zoroasterismo. At mayroon din na iilang mga indibiduwal  sa kanila na yumayakap  sa Al-Hanafeeyah, ang sistema sa pananampalataya batay sa paniniwala ni Abraham(AS).

 Ang saligan ng buhay pang-ekonomiya ng mga Badawee -  ang mga Arabiano na pagala-gala at walang pirmihang tirahan – ay ang yamang panghayupan  na nababatay sa pagpapastol. At ang saligan naman ng buhay pang-ekonomiya ng mga Hadir – ang mga Arabiano  na nakatira sa isang nayon o bayan  at may pirmihang tahanan – ay ang pagsasaka at pangangalakal. Bago dumating ang  Islam, ang Makkah ang siyang pinakamalaking lunsod pangkalakalan  sa Arabia. Mayroon na ring mga mauunlad na mga pamayanan sa iba’t-ibang dako ng Arabia noong panahong iyon.

 

Hinggil naman sa kalagayang panlipunan, ang kawalang-katarungan ay laganap,  walang karapatan ang mahihina, kanilang inililibing ng buhay ang mga batang  babae at pinagkakaitan ng karapatan  ang isang mahina. Ang mga alipin ay kaaba-aba at wala ni katiting na karapatan. Ang pag-aasawa ng higit sa isa ay  walang hanggan ang bilang. Ang pangangalunya ay laganap sa lahat maliban sa  iilan. Ang digmaan ng mga lipi ay laganap na karaniwang nangyayari sanhi ng napakababaw na mga kadahilanan.

 

Ang Handog

 

Ipinagmamayabang  noon ng mga Quraysh kay ‘Abdulmuttalib na lolo ng Propeta Muhammad (SAS) ang pagkakaroon nila ng maraming supling at ari-arian. Kaya naman gumawa ng panata si Abdulmuttalib na kung siya ay pagkakalooban ni Allah ng sampung anak na lalaki, kanyang iaalay sa mga diyus-diyosan ang isa sa kanila. Natupad ang kanyang ninais,  siya ay napagkalooban ng sampung anak na lalaki. Ang bunso sa kanila ay si Abdullah na ama ng Propetaa (SAS). Nang nais nang isakatuparan ni ‘Abdulmuttalib ang kanyang  pangako ay sinalungat  siya ng mga tao  at pinigilan upang sa gayon ay huwag itong gawin ng mga tao na isang kaugalian. Nagkaisa sila na gumawa ng palabunutan   upang pagbunutan  si ‘Abdullah  at ang sampung kamelyo bilang pantubos a kanya. Magdadagdag sila ng sampung kamelyo sa tuwing si ‘Abdullah ang mabubunot. Isinagawa nila ang pagbunot. Ngunit sa tuwina ay si ‘Abdullah ang siyang nabubunot. Pagsapit ng ikasampung pagbunot ay saka pa lamang nabunot ang kamelyo na umabot na sa isandaan. Inialay nila ang mga kamelyo.

 

Si Abdullah ang pinakamamahal ni Abdulmuttalib sa lahat ng kanyang mga anak. Lalo na nang matapos ang pag-aalay at nang  nagsimula na itong lumaki at magbinata  ay lumitaw  sa noo nito ang mga luningning na hindi nakikita sa ibang tao. Nang sumapit  na sa wastong gulang  itong si Abdullah ay pumili ang ama niya para sa kanya ng isang dalagang kaanib ng liping Banu Zuhrah. Ang pangalan ng dalaga ay Aminah bint Wahb. Ipinakasal  ni ‘Abdulmuttalib ang kanyang anak na si Abdullah sa dalagang ito. Pagkatapos ng kanilang pag-iisang dibdib  ay naglaho ang kislap na noon ay nasa noo ni ‘Abdullah at iyon ay nalipat sa sinapupunan ni Aminah.

 

Ginampanan ni ‘Abdullah ang kanyang papel sa larangan ng buhay at paghahanapbuhay. Tatlong buwan matapos ipagbuntis ni Aminah ang Sugo ni Allah (SAS)  ay lumisan si ‘Abdullah kasama ang karaban ng mga kalakal patungong SHAM* . Nang siya ay nasa daang pauwi, siya ay nagkasakit. Tumigil siya sa Madinah sa piling kanyang mga tiyuhin sa ina na kaanib ng liping Banu An-Najjar. Doon siya nalagutan ng hininga at inilibing.

 

Ang Kapanganakan ng Sugo (SAS)

 

Patapos na ang mga buwan ng pagdadalang-tao ni Aminah at palapit na ang araw ng pagsilang. Nagsimula na ang pananakit ng kanyang tiyan ngunit hindi siya nakadama ng sakit at hirap na karaniwang dinaranas ng mga kababaihan kapag nagsisilang. Araw ng  Lunes ng ika-12 araw ng Rabee’ul’awwal noong taong 571 A.D. nang isilang ni Aminah ang kanyang sanggol. Ang taon ng kapanganakan ng Sugo (SAS) ay tinatawag din na Taon ng Elepante.

 

Ang  Taon ng Elepante 

 

Narito ang buod ng kasaysayan ng elepante. Nang malaman ni Abrahah na siyang kinatawan ng hari ng Ethiopia sa Yemen na ang mga Arabiano  ay nagsasagawa ng Hajj sa Ka’abah (dumadalaw roon upang sumamba), siya ay nagpatayo ng simbahan sa San’a (ang kabisera ng Yemen sa ngayon). Nais niyang mabaling sa simbahang ito ang isinasagawang Hajj ng mga  Arabiano. Ang tungkol dito ay narinig ng isang lalaking kaanib sa liping Banu Kinanah (isa sa mga lipi ng mga Arabiano) . Kaya ‘t isang gabi ay pinasok niya ang simbahan at nilagyan ng dumi ng tao ang mga dingding nito. Nang malaman ni Abrahah ang nangyari ay sumambulat ang kanyang galit. Kasama ang malaking hukbo na binubuo ng 60,000 mga kawal ay lumisan  siya papuntang  Ka’abah upang ito ay wasakin. Pinili niya para sa kanyang sarili ang pinakamalaking elepante. Ang hukbo ay may siyam na elepante. Nagpatuloy sila sa kanilang paglalakbay hanggang sa makarating sa isang  pook na malapit sa Makkah. Inihanda niya roon ang hukbo. Nakahanda  na ang kanilang pagpasok sa Makkah ngunit  ang elepante  ay lumuhod at ayaw sumulong papuntang Ka’bah.Tuwing kanilang ibinabaling ang elepante sa ibang dako, tumatayo ito at mabilis na lumalakad. Ngunit kapag ibinabaling  nila ito sa dakong kinaroroonan ng Ka’abah, ito ay lumuluhod. Habang sila ay nasa gayong kalagyan ay nagpadala si Allah  laban sa kanila ng mga kawan ng ibon na nagpupukol sa kanila ng mga batong buhat sa natuyong putik . Kaya ginawa Niya (Allah ) silang animo’y uhay na kinainan. Ang bawat ibon ay nagdala ng tatong bato: isang baso sa tuka at tig-iisang bato sa bawat paa. Ang mga bato ay kasinlaki ng garbansos. Ang bawat tamaan sa kanila ay nagkakahiwa-hiwalay  ang mga bahagi ng katawan  at  namamatay. Nagsialis sila at nagkandaduwal sa daan. Si Abraha naman ay pinadalhan ng karamdamang sanhi nito ay unti-unting napuputol ang bawat dulo ng kanyang mga daliri. Nang marating niya  ang San’a ay animo siya isang basang sisiw. Doon na  siya namatay . Ang mga Quraysh naman ay nagkahiwa-hiwalay. Mayroon sa kanilang nagtago sa mga lambak  at mga bundok dahil sa takot sa hukbo. Nang maganap sa hukbo ang di-inaasahan, ang mga Quraysh ay panatag na nagsibalik sa kani-kanilang tahanan. Ang mga pangyayaring ito ay naganap limampung –araw bago  isinilang ang Propeta (SAS).

 

Nakaugalian na noon ng mga Arabiano na maghanap ng isang babaeng taga-disyerto upang ito ang siyang magpasuso sa kanilang mga supling ay upang mga bata ay lumaki sa disyerto nang mga malusog na pangangatawan. Nang mga panahong iyon ay may dumating sa Makkah na isang pangkat na mga taong buhat sa liping Banu Sa’d upang maghanap ng mga batang mapasuso kapalit ng kabayaran. Nagsimulang mamahay-mahay ang  mga kababaihan  sa pangkat na ito. Inayawan nilang lahat si Muhammad  (SAS) dahil sa pagiging ulila  at mahirap nito. Si Haleemah As-Sa’deeyah (RA) ay isa sa mga kababaihang ito. Umayaw rin siyang katulad nila. Subalit matapos na magsadya sa maraming  bahay ay hindi nakamit ang kanyang hangad. Hindi siya nakatagpo ng  maisasamang  batang kanyang  pasususuhin kapalit ng kabayarang kahit paano ay  makapagpapagaan sa paghihikahos  sa pamumuhay at hirap ng buhay lalo pa nga at ng mga taon na iyon ay may tag-tuyot. Binalikan niya ang bahay ni Aminah at nagkasya na siya sa isang sanggol  na ulila at sa maliit nakabayaran.

 

Nang pumunta si Haleemah (RA) sa Makkah na kasama ang kanyang asawa, siya ay sakay ng isang payat at makupad na inahing asno. Samantalang siya  ay  nasa  daang  pauwi  na  kalong-kalong   ang sanggol na si Muhammad (SAS), tumakbo nang napakabilis  ang inahing asno na kanyang sinasakyan at napag-iwanan ang lahat ng mga kasabay na nakaangkas sa kanilang sasakyang hayop. Ang pangyayaring ito ay labis na ipinagtaka ng kanyang mga kasamahan.

 

Isinalaysay ni Haleema (RA) na dati-rati ay halos walang lumalabas na gatas sa kanyang suso. At ang kanyang  anak na maliit ay lagi na lamang umiiyak sa tindi ng gutom. Ngunit ng kanyang isinubo ang kanyang suso sa sanggol na si Muhammad (SAS), masaganang dumaloy  ang gatas. Ikinuwento rin niya na  ang tungkol sa tag-tuyot  na dumaaapo sa lupang pinaninirahan ng kanyang lipi-ang liping banu Sa’d. Subalit nang makamit na niya  karanangalang magpasuso sa sanggol na ito, naging mabiyaya ang kanilang lupain at ang kanilang hayupan. Lubos na nabago ang kanilang kalagayan; ang kasalatan at hirap ay naging kasaganaan at kaginhawahan.

 

Dalawang taon na nanatili si Muhammad (SAS) sa pangangalaga ni Haleemah (RA).  Labis-labis ang  nadaramang pagmamahal sa kanya ng kanyang ina-inahang si Haleemah (RA). Nadarama nito  na sa kaibuturan ng puso nito na may mga bagay-bagay at mga hindi pangkaraniwang pangyayari na bumabalot sa batang ito. Matapos ang dalawang taon, dinala ni Haleemah (RA) ang bata sa ina nito at sa lolo  na si ‘Abdulmuttalib sa Makkah. Subalit itong si  Haleema (RA) na nakasaksi sa biyayang dala ng bata na nagpaigi sa kanilang kalagayaan ay nagpumilit kay Aminah na sumang-ayon muling manatili ang bata sa kanyang piling. At sumang-ayon naman si Aminah. sa pagbalik  ni Haleema (RA) sa tirahan ng liping Banu Sa’d na kasama ang batang ulila sa  ama ay nag-uumapaw ang kanyang kagalakan ay walang mapaglagyan ang kanyang kaligayahan.

 

Ang Pagbiyak ng Dibdib

 

Iang araw noong malapit nang mag-apat na taong gulang si Muhammad (SAS0, habang siya ay kasama ng kanyang kapatid sa gatas na anak na lalaki ni Haleemah (RA) ay naglalaro na malayo sa mga kubol na pinaninirahan ng mga tao, biglang umalis ang anak na ito ni Haleemah (RA) at tumatakbong dumating kay Haleemah. Dumating itong ang mukha ay kakikitaan ng mga tanda ng pagkatakot. Hiniling ng bata sa ina na puntahan si  Muhammad (SAS). Tinanong  ito ni Haleemah (RA) kung bakit. “ Nakita ko pong kinuha si Muhammad ng dalawang lalakingg nakasuot ng puting kasuutan. Kanila pong  pinahiga ito at saka biniyak ang dibdib.” Sagot ng bata sa ina. At bago natapos ang salaysay ng bata ay tumakbo na si Haleemah (RA) papunta kay Muhammad (SAS). Nakita niya ito  na nakatayo  lamang at walang tinag. Halata ang pamumutla sa mukha  nito at ang pagbabago ng kulay. Balisang-balisa si Haleemah (RA) habang tinatanong niya kung ano ang  nangyari. Sabi naman ni Muhammad (SAS0 ay mabuti ang kanyang kalagayan. Ikinuwento nito kay Haleemah  na may dalawang lalaking kumuha sa kanya. Aniya  ay biniyak ng dalawang ito ang  kanyang dibdib, inalis ang kanyang puso, at saka may inalis dito na isang kulay itim na bagay. Pagkatapos nito ay hinugasan nila ang kanyang puso sa  malamig na tubig, ibinalik  sa dibdib, at saka pinahiran  ang ibabaw ng dibdib. Lumisan ang dalawa at di-naglaon ay naglaho. Tinangka nai Haleemah (RA) na salatin ang pinagbiyakan ngunit wala siyang nasalat na bakas. Dahil sa  pangyayaring ito ay ibinalik niya sa Muhammad (SAS)  sa kanilang tinutuluyan,. Pagsapit ng madaling –araw  ay dala-dala ni Haleemah (RA) si  Muhammad (SAS) papunta sa Makkah. Ipinagtaka ni Aminah ang pagsauli ni Haleema (RA) sa bata nang wala sa panahon sa kabila ng pagkahumaling  nito sa kanya (Muhammad). Itinanong niya (Aminah) sa kanya (Haleemah) kung ano ang dahilan. Matapos ang kanyang  pagpupumilit ay sinabi na rin ni Haleemah (RA) ang nangyaring pagbibiyak sa dibdib.

 

Ang Pagyao ni Aminah

 

Nagpunta si Aminah kasama ang anak na ulila sa Yathrib (ito ang pangalan ng Madinah noon) upang dalawin ang mga kamag-anakan nito na kaanib sa liping  Banu An-Najjar. Nanatili sila roon ng mga ilang araw. Nang si Aminah ay nasa daan pauwi ay binawian siya ng buhay  sa isang lugar na kung tawagin ay Al-Abwa’. Doon na rin siya inilibing . Kaya itong si Muhammad (SAS)  sa murang  gulang niyang apat na taon ay  namaalam na sa kanyang yumaong ina.

 

Tungkulin na ngayon ng lolo ni Muhammad  (SAS) na si ‘Abdulmuttalib na punuan ang malaking kawalang dulot ng pagyao ng ina ng apo nito. Kaya naman inalagaan, kinalinga, at kinahabagan siya ng  kanyang lolo. Nang anim na taong gulang na si Muhammad (SAS) ay yumao naman ang kanyang lolo kaya ang kanyang tiyauhin na si Abu Talib – sa kabila ng dami ng anak nito at kakulangan nito sa yaman- ang siyang kumalinga sa kanya. Itinuring siya ng kanyang tiyuhin na parang isa sa kanilang mga anak. Labis namang napalapit  ang kanyang damdamin sa kanyang tiyuhin. Sa ganitong kalagayan nagsimula ang unang paghubog sa kanya. Lumaki siya sa pagiging matapat at sa pagiging  mapagkakatiwalaan  anupa’t sa dalawang katangiang ito siya nakilala. Kaya’y kapag sinasabing  “ dumating ang mapagkakatiwalaan, “ alam na si Muhammad (SAS) ang siyang tinutukoy.

 

Nang  siya ay magbinatilyo na at lumaki-laki nang  kaunti, sinimulan niyang tangkain na umasa sa kanyang sarili sa mga bagay-bagay na may kinalaman sa kanyang buhay. Naghanap siya ng kanyang ikabubuhay. Nagsimula na siyang magtrabaho at kumita. Nagtrabaho siya sa mga Quraysh  bilang  pastol ng kanilang tupa kapalit ang ilang halaga ng salapi. Sumali rin siya sa paglalakbay  pangkalakalan  patungong Sham. sa paglalakbay pangkalakalang ito na kanyang nilahukan ay malaki ang puhunang iniambag ng isang marangal  at mayamang babae  na  ang pangalan ay Khadeejah  bint Khuwaylid (RA). Ang katiwala nito sa kalakal sa paglalakbay na iyon ay ang alila nitong si Maysarah  na siya ring tagapangasiwa ng mga gawain.

 

Dahil sa biyayang taglay ni Muhammad at katapatan nito ay kumita ang kalakal ni Khadeejah (RA) na pakinabang na hindi pa niya kinita noon. Kaya tinanong niya ang kanyang alila na si Maysarah kung ano ang dahilan ng malaking kita  na ito. Ipinagbigay –alam ni Maysarah sa kanya na si Muhammad (SAS) ang siyang bumalikat  sa pag-aalok sa pagtitinda. Malaki ang ginawang pagtangkilik sa kanya ng mga tao kaya naman malaki ang kinita  ng walang pandaraya. Nakinig si Khadeejah (RA) sa kanyang alila  bagaman alam na niya noon pa man ang ilang bagay tungkol kay Muhammad (SAS). Lalong tumindi ang kanyang  paghanga rito.

 

Isa nang balo si Khadeejah (RA) nang kanyang nakilala si Muhammad (SAS). Nagkaroon na siya ng asawa noon pa man dangan nga lamang at iyon ay namatay. Ninais niyang  pasukin  muli ang  buhay may asawa  sa pakikipag-isang dibdib kay Muhammad (SAS). Sinugo niya rito ang  isa mga babaeng kamag-anak niya upang magsiyasat  para sa kanya hinggil sa magiging tugon ni Muhammad (SAS) sa balak  niyang pakikipag-isang –dibdib dito. Nang mga panahong iyon ay sinapit na ni Muhammad (SAS) ang gulang  na dalawampu’t lima. Pinuntahan ito ng isang babae  upang ilahad sa  kanya ang alok ni Khadeejah (RA) na makipag-isang dibdib sa kanya. Tinanggap niya (Muhammad, [SAS] ) ang alok na ito.

 

Idinaos ang kasalan . Nalugod ang isa’t-isa sa kanila. At matapos ang pag-iisang dibdib ay nagsimulang pamahalaan ni Muhammad (SAS) ang mga kapakanan ng kalakal ni  Khadeejah (RA). At pinatunayan naman niya ang kanyahg kahusayan at kakayahan. Nagkasunod-sunod ang pagdadalang-tao  at ang panganganak ni khadeejah (RA). Ang kanilang mga naging anak na babae ay sina Zaynab, Ruqayyah, Umm Kulthum, at Fatimah. Ang kanilang mga  anak na lalaki ay sina Al-Qasim at Abdullah  ay pawang mga batang paslit  pa lamang ng mangamatay.

 

Ang  Pagkapropeta

 

Nang papalapit na si Muhammad (SAS) sa gulang na apatnapu ay naging madalas  ang pag-iisa at pananatili niya sa yungib ng Hira’ sa isang bundok na malapit sa Makkah. Ginugugol niya roon ang mga araw at  mga gabi. Noong gabi ng ika-21 ng buwan ng Ramadan habang siya ay nasa  yungib ng Hira’ at nang mga sandaling iyon ay kanya nang sinapit ang gulang na apatnapu, pinuntahan siya ng Anghel na si Jibreel (Gabriel [AS]* ). “ Bumasa ka,” ang sabi nito sa kanya. “Hindi ako marunong bumasa,”  tugon naman niya rito. Inulit ni Jibreel (AS) ang kanyang sinabi sa ikalawa at ikatlong pagkakataon. Ngunit sa ikatlong pagkakataon ay sinabi niyang: “Bumasa ka sa ngalan ng iyong Panginoon na lumalang, lumalang sa tao buhat sa namuong dugo. Bumasa ka sapagkat ang iyong Panginoon  ay ang  Pinakamapagbigay, nagturo sa pamamagitan ng panulat, nagturo sa tao ng hindi nito nalalaman.” At pagkatapos nito ay iniwan na ng Anghel si Propeta Muhammad (SAS)

 

Matapos na matanggap ng Propeta (SAS) ang kauna-unahang pahayag ay kaagad siyang lumisan. Hindi na niya matiis na manatili pa sa yungib ng Hira’ kaya’t umuwi na siya sa kanilang tahanan . Kumakabog ang kanyang dibdib nang siya ay pumasok sa kinaroroonan ni Khadeejah (RA). “ Balutin ninyo ako, balutin ninyo ako!” sabi niya. Binalutan naman siya upang maalis ang sindak sa kanya. Isinalaysay  niya kay Khadeejah (RA) ang nangyari sa kanya . “ Natakot ako para sa aking sarili “ sabi pa niya. Kaya’t ang sabi  sa  kanya ni Khadeejah (RA):           “ aba’y huwag , sa halip ay magalak ka. Isinusumpa ko  kay Allah , hinding –hindi ka bibigyan ni Allah ng  kahihiyan. Pinakikitunguhan mo ng mabuti ang iyong mga kamag-anak, makatotohanan  ka sa iyong pananalita , tumutulong ka sa naghihikahos, magiliw ka sa mga panauhin, at umaagapay  sa dinapuan ng kasawiang- palad. “

 

Pagkalipas ng ilang araw ay nagbalik  na muli siya sa yungib ng Hira’ upang ipagpatuloy ang kanyang pagsamba at upang tapusin  doon ang mga natitirang araw ng Ramadan. Nang matapos ang buwan ng Ramadan ay nanaog siya buhat sa yungib upang bumalik sa Makkah. Nang siya ay nasa daan na, pinuntahan siya ni Jibreel (AS) na nakaupo sa isang upuang nasa pagitan ng  langit at lupa. Matapos ang pangyayaring ito ay ibinaba ang ayah ng Qur’an na nagsasabing: “ O Ikaw na nababalot ng sarili, bumangon ka at magbabala. At dakilain mo ang iyong Panginoon. At linisin mo ang iyong kasuutan. At layuan mo ang kasalanan.” (74 : 1-5 ). At pagkatapos nito ay nagpatuloy  at nagkasunod-sunod na ang pagdating ng kapahayagan.

 

Nang simulan ng Propeta (SAS) ang kanyang pag-aanyaya sa mga tao sa Islam, tinugon ng kanyang butihing maybahay ang panawagan ng pananampalataya. Sinaksihan ni Khadeejah (RA) ang kaisahan ni Allah at ang pagiging  Propeta  ng kanyang marangal na asawa. Si Khadeejah (RA) ang kauna-unahang yumakap sa Islam. Bilang pagtanaw ng utang na loob sa kanyang tiyuhing si Abu Talib na siyang tumangkilik  at nag-alaga sa kanya noong magsimulang siya ay maging ulilang lubos sa magulang at sa kanyang lolo ay pinili niya si Alee (RA) sa mga anak nito upang alagaan sa kanyang piling at gugulan sa mga pangangailangan nito. Sa ganitong kalagayan binuksan ni ‘Alee (RA) ang kanyang puso at ang kanyang  pag-iisip  kaya naman sumampalataya  at naniwala siya ng walang pagdadalawang-isip. Pagkatapos niyon ay sumunod naman sa pagpasok sa Islam si Zayd bin al-Harithah (RA) na alila ni Khadeejah (RA). Kinausap ng Sugo ni Allah ang kanyang matalik na kaibigan na si Abu Bakr (RA) at ito naman ay sumampalataya at naniwala  nang walang pag-aalinlangan.

Nanatiling lihim ang pagpapalaganap ng Islam sa simula, Ang ibig sabihin ng lihim ay pagiging  lihim ng pook na pinagtitipanan ng mga kasamahan at tagasunod ng Propeta at ng mga taong kanilang inaanyayahan na sa bandang huli  ay nagsiyakap din sa Islam. Marami ang naniniwala sa kanya ngunit inilihim nila ang kanilang pagpasok sa Islam. Kapag natuklasaan ang pagpasok sa islam ng isa sa kanila, ang isang ito ay napasasailalim sa napakahirap na uri ng pahirap upang  sa gayon ay tumalikod ito  sa  Islam.

 

Matapos na gumugol ang Sugo ni Allah (SAS) ng tatlong taon sa paisa-isang pag-aanyaya sa Islam ay ibinaba ni Allah ang talata na ito ng Qur’an: “ Kaya’t lantaran mong ipahayag ang ipinag-uutos ko sa iyo at pabayaan mo ang panlalait ng mga Mushrik.” (15 :94 )

Dahil sa kapahayagang ito , isang araw ay umakyat siya sa burol ng Safa at tinawag ang mga Quraysh (ang mga taga Makkah). Pinagtipunan siya ng maraming tao at kabilang na sa mga iyon ang kanyang tiyuhing si Abu Lahab na may napakalaking pagkamuhi kay Allah at sa kanya na Sugo ni Allah (SAS). Nang pinagtipunan ng mga tao si Muhammad (SAS) ay nagsalita siya: “ sa tingin ba ninyo kung sakaling ipagbigay-alam ko sa inyo na sa likod ng bundok na iyon ay may mga kalaban na nakahandang sumalakay sa inyo , paniniwalaan ba ninyo ako?”, sabi niya “Wala kaming nalaman sa iyo kundi ang makatotohanang salita at ang katapatan”, sagot nila. Kaya’t ang sabi niya sa kanila : “ Ako sa inyo ay isang tagapagbabala  tungkol sa napipintong matinding kaparusahan.” At nagpatuloy ang Sugo ni Allah (SAS) sa pag-aanyaya sa kanila sa wagas na pagsamba kay Aallah at ssa pagwawaksi sa mga diyus-diyusan. Habang siya ay nagsasalita ay tumayo sa gitna ng mga tao si Abu lahab na nagpapagpag ng mga kamay nito at sinabing: “Sumaiyo ang kasawian: ito ba ang dahilan ng pagtawag mo sa amin?” kaya dahil sa pangyayaring ito ay ibinaba ni Allah ang Surah na: “ Masawi na ang dalawang kamay ni Abu Lahab at masawi na rin siya! Walang magagawa  para sa kanya ang kanyang kayamanan at ang kanyang natamo (anak). Ipapasok siya sa apoy  na nagliliyab. At (gayundin ang gagawin sa) asawa niya, ang tagapasan ng kahoy. (lalagyan ito) sa leeg ng lubid na yari sa masad*.”

 

Nagpatuloy ang Propeta (SAS) sa ginagawa niyang pag-aanyaya sa Islam. Nagsimula siyang ipahayag ang Islam sa mga pinagtitipunan ng mga tao kasabay ng pag-aanyaya sa kanila sa Islam. Hayagan na siyang nagdarasal  sa Ka’bah. Sa pangyayaring ito ay lalo pang pinag-ibayo ng mga Quraysh ang  kanilang pamiminsala sa mga Muslim lalong-lalo na sa mga Muslim na aliping katulad nina Yasor, Sumayyah, at kanilang anak na si Ammar (RA). Namatay sina Sumayyah at Yasir (RA) na alay ang buhay sa Islam. Itong si Sumayyah na ina ni Yasir (RA) ang kauna-unahang nagbuwis ng buhay alang-alang sa Islam. Namatay sila dahil sa mga pahirap na kanilang dinanas . Dumanas din ng pahirap si Bilal bin Rabah (RA) na taga-Ethiopia sa kamay naman ni Abu Jahl at Umayyah bin Khalaf. Pumasok Sa Iskam si Bilal bin Rabah (RA) sa pamamagitan ni Abu Bakr (RA). Nang malaman ng kanyang Panginoong si Umayyah bin Khalaf na siya ay pumasok  sa Islam ay ginamit nito sa kanya ang lahat ng pamamaraan ng pagpapahirap nang sa gayon ay talikuran niya ang Islam. Subalit tumanggi siya at nanatili sa kanyang paniniwala. Madalas siyang dalhin ni Umayyah sa labas ng Makkah. Pinahihiga siya sa nakapapasong buhangin ng disyerto habang siya ay natatalian ng tanikala at may isang tipak na malaking bato  na nakapatong sa kanyang dibdib. Hinahagupit ng latigo ni Umayyah at ng mga kasama nito si Bilal (RA) na paulit-ulit  na nagsasabing “Ahad, Ahad” na ang ibig sabihin ay  iisa, iisa ang Diyos. Ganito ng ganito ang nangyayari  hanggang sa malaman ni Abu Bakr (RA) na si Bilal ay nasa gayong kalagayan. Kaya naman binili niya kay Umayyah itong si Bilal (RA) at pinalaya alang-alang kay Allah . Dahil sa mga paniniil sa  mga Muslim, makatuwiran lamang na pigilan ng Sugo ni Allah (SAS) ang mga Muslim ma harapang ipahayag ang kanilang  pagpasok sa Islam yamang siya naman ay nakikipagkita nang lihim sa kanila. Kung nagkataong siya ay hayagang  nakikipagkita sa kanila, walang dudang  ang mga Quraysh ay magsisilbing hadlang sa  kanyang pagtuturo at pagpapatnub ay  sa mga Muslim. At maaaring mauwi pa iyon sa komprontasyon  ng magkabilang panig. At malamang na ang komprontasyon ay mauwi sa pagkadurog  at pagkaubos ng mga Muslim. Kaya’t  makatuwiran  ang paglilihim. Sa kabilang dako,ang Sugo ni Allah ay hayagan sa kanyang pag-aanyaya sa Islam at sa pagsamba sa gitna ng mga pagano sa kabila ng mga pananakit na kanyang natatamo buhat sa mga Quraysh.

 

Ang Paglikas Sa Ethiopia

 

Sa harap ng patuloy na ginagawang pagpapahirap ng mga paganong Quraysh sa sinumang matuklasang pumasok sa Islam lalo na ang mga mahihina sa kanila, hiniling ng Sugo (SAS) sa kanyang mga kasamahan na alang-alang sa kanilang pananampalataya ay lumikas sila  sa  Ethiopia na pinamumunuan ng Najashi (ito ang tawag noon sa mga hari ng Ethiopia) sapagkat matatagpuan nila roon ang kapanatagan  lalo pa at ang marami sa mga Muslim  ay natatakot na sila  at ang kanilang pamilya ay gawan ng masama ng mga Quraysh. Naganap ito noong  ikalimang taon ng pagka-Propeta ni  Muhammad (SAS). Pitumpung Muslim  ang lumikas . Kabilang sa kanila si Uthman bin Affan (RA) at ang kanyang maybahay na si Ruqayyah (RA) na anak ng Sugo (SAS). Tinangka ng Quraysh na siraan ang mga Muslim na pumunta sa Ethiopia. Nagpadala sila ng mga regalo kay  Najashi at hiniling sa kanya na ibigay sa kanila ang mga nagsilikas na iyon. Sinabi nilang nilalait diumano ng mga Muslim si Hesus (AS) at ang ina nito. Ngunit nang itanong ni Najashi  sa mga Muslim ang tungkol doon ay nilinaw ng mga Muslim sa kanya ang sinasabi ng Islam tungkol kay Hesus (AS) at nilinaw nila sa kanya ang katotohanan. Pinangalagaan niya ang Muslim at tumangging ibigay sila sa mga Quraysh.

 

Nang buwan ng Ramadan  ng taon ding iyon ay pumunta ang Sugo (SAS) sa malapit sa Ka’bah na nang mga sandaling iyon ay may  malaking  pagtitipon ng mga Quraysh.Walang anu-ano’y bigla niyang binigkas ang Suratun Najam. Ang mga di-mananampalatayang ito ay hindi pa nakaririnig ng salita ni Allah dahil na rin sa patuloy nilang pagpapayo sa isa’t-isa na huwag makinig sa anumang sinasabi ng Propeta (SAS). Kaya’t nang sila  ay binigla ng pagbigkas ng Surah na ito at kumatok sa kanilang mga tainga ang nakahahalinang makadiyos na mga salitang iyon, ang bawat isa ay nanatiling matamang  nakikinig doon. Walang anumang  sumasagi sa kanilang isipan maliban sa pakikinig  hanggang  sa bigkasin ng Sugo (SAS) ang “ Kaya’t magpatirapa kayo kay  Allah at sumamba (sa Kanya)”. Wala sa kanilang nakapagpigil sa kanilang sarili anupa’t sumubsob silang nakapatirapa. Sa pangyayaring iyon ay nagkasunod-sunod tuloy ang paninisi sa kanila ng mga Quraysh na hindi nakasaksi sa pangyayaring iyon. Dahil doon  ay pinaratangan  nila ng kasinungalingan ang Sugo (SAS). Sinabi pa nilang pinuri diumano ng Sugo (SAS) ang kanilang mga diyus-diyusan at sinabi raw niya na kailangang hangarin  ang pamamagitan ng mga diyus-diyusang ito. Ginawa  nila ang malaking kasinungalingang ito upang magkaroon sila ng ipandadahilan kung bakit sila nagpatirapa.

 Ang Pagyakap ni Umar (RA) Sa Islam

 Ang pagyakap ni Umar ibnul-Khattab (RA) sa Islam  ay isang malaking tulong sa mga Muslim. Tinawag siyang Al-Farooq ng Sugo (SAS) sapagkat nilinaw sa kanya ni Allah  ang pinagkaiba ng katotohanan sa kabulaanan. Ilang araw pa lamang matapos na pumasok sa Islam si ‘Umar (RA) ay sinabi niya sa Sugo ni Allah (SAS): “O Sugo ni Allah, hindi ba’t tayo ang nasa katotohanan ?” “Oo,” tugon naman nito. “ Kung gayon, bakit pa tayo nagtatago at hindi lumalantad?,” tanong ni Umar  (RA). Dahil dito ay lumabas  ang Sugo ni Allah (SAS) kasabay ng mga Muslim na kasama  niya sa bahay ni Al-Arqam (RA) – ang bahay na kanilang pinagtitipanan.

  

Lumabas sila at bumuo ng dalawang pangkat  na pinamumunuan ni Hamzah bin Abdulmuttlib (RA) na tiyuhin ng Sugo (SAS) ang isang pangkat  at ang isa naman ay pinamumunuan ni ‘Umar  bin Al-Khattab (RA). Pumunta sila sa mga lansangan ng Makkah sa kilos na nagbibigay-alam sa lakas ng pagsulong ng paglaganap ng Islam.

 

Ginawa na ng mga Quraysh  ang maraming pamamaraan  para kalabanin ang pagpapalaganap  ng Islam. Nagpahirap na sila, naniil, nanlinlang, at naghikayat. Ngunit ang lahat ng iyon ay walang naging bunga kundi ang ibayong pananalig sa Islam at ang pagdami ng mga mananampalataya. Sanhi nito ay napagkaisahan nilang magsulat ng isang kasulatang lalagdaan nilang lahat  at isasabit sa loob ng Ka’bah. Ang kasulatang ito ay nagsasaad  ng kanilang buong pagkakaisang di-pagtangkilik (boycott) sa mga Muslim at sa angkan ni Hashim, ang angkan ng Propeta (SAS). Ang pagkakaisang ito sa hindi pagtangkilik ay malawakan: hindi sila pagbibilhan, hindi bibilhan, hindi makapag-aasawa mula sa kanila, hindi makikipagtulungan, at hindi sila  pakikitunguhin. Sa pangyayaring ito ay napilitan  tuloy  ang  mga  Muslim  na  umalis  sa  Makkah  at nagpunta sa isang lambak na tinatawag na Shi’b Abi Talib (Lambak ni Abu Talib).

Dumanas doon ng matinding pasakit ang mga Muslim at lumasap ng gutom at iba’t-ibang uri ng kapighatian. Ibinigay ng mga may kaya sa kanila  ang lahat ng kanilang ari-arian. Lahat ng ari-arian ni Khadeejah (RA) ay naubos na. Lumaganap na sa kanila ang mga sakit at ang karamihan sa kanila ay nasa bingit na ng kamatayan. Subalit  nagpakatatag sila nagtiis, at walang isa mang tumalikod sa kanila sa Islam. Nagtagal ang paninikis na ito sa loob ng  tatlong taon. Ngunit pagkalipas ng tatlong taon, ang nilalaman ng kasulatan  ay pinawalang bisa  ng  ilang  mahahalagang tao sa mga Quraysh na kamag-anak ng ilang kasapi ng angkan ni Hashim. Ipinahayag nila iyon sa pamunuan ng Quraysh. Nang inilabas nila ang kasulatan ay napag-alaman nilang ito ay kinain na ng anay  at walang natira rito kundi ang maliit na bahaging  kinasusulatan ng “Sa Ngalan Mo Allah,” Naglaho na ang krisis. Nagbalik na ang mga Muslim at ang angkan ni Hashim sa Makkah  ngunit nanatili pa rin ang Quraysh sa kanilang matigas na saloobin  sa  pagsalungat sa mga Muslim.

 

 

Taon ng Dalamhati

 

Kumakalat ng ang malalang karamdaman ni Abu Talib sa kanyang buong katawan at nananatili siyang nakaratay sa higaan. Hindi naglaon ay heto na siya at dumaranas ng matijding hirap na dulot ng paghihingalo samantalang ang Sugo ni Allah (SAS) ay nasa kanyang ulunan at nagsusumamo sa kanya na sabihin ang La Ilaha Illallah* bago man lamang siya mamatay. Subalit  ang mga masasama na pinangungunahan ni Abu Jahl ay ang mga pumipigil sa kanya  ‘ Huwag mong talikuran ang paniniwala ng iyong mga ninuno ,’ sabi nila sa kanya. Dahil doon ay namatay siya sa  shirk** .  Kaya naman ibayong dalamhati ang nadama ng Sugo ni Allah (SAS) dahil sa pagyao ni Abu Talib at sa hindi nito pagyakap sa Islam. Pagkalipas ng kulang-kulang dalawang buwan mula ng yumao si Abu Talib ay yumao na rin ang kanyang maybahay na si Khadeejah (RA)

 

Ang Pagpunta Sa Ta’if

 

Nagpatuloy ang mga Quraysh sa kanilang panunupil, pagmamalabis, at pamiminsala sa mga Muslim. Nawalan na ng pag-asa ang Sugo ni Allah (SAS) na bubuti  pa ang saloobin ng mga Quraysh kaya’t napag-isip naman niya ang kanyang butihing maybahay na si Khadeejah (RA). Kaya gayon na lamang ang tindi ng  lungkot ng Sugo (SAS). Tumindi pang lalo ang dinanas na pagsubok ng Sugo ni Allah (SAS) sa kamay ng kanyang mga kalipi buhat ng yumao ang kanyang tiyuhin na si Abu Talib at ang  pumunta sa Ta’if sa paghahangad na harinawa ay patnubayan ni Allah sa Islam ang mga naninirahan sa bayang iyon. Ang paglalakbay patungong Ta’if ay hindi isang madaling bagay sanhi ng mahirap na daan dahil na rin sa mga nagtataasang bundok na nakapaligid sa bayang ito.Totoo nga na ang bawat mahirap ay  nagiging madali alang-alang kay Allah subalit ang mga naninirahan sa Ta’if ay walang itinugon  sa kanya kundi ang pinakamasagwang tugon.  Sukat ba namang inudyukan nila ang mga bata na pukulin ng bato  ang Sugo (SAS) hanggang sa siya ay magkasugat-sugat  at tumulo ang dugo sa kanyang bukong-bukong. Sanhi nito ay malungkot  at namimighati niyang tinunton pabalik sa Makkah ang kanyang daanan. Walang anu-ano ay pinuntahan siya  ni Jibreel kasama ang anghel ng mga kabundukan. Tinawag siya ni Jibreel (AS) at sinabing: “ Ipinadala sa iyo ni Allah ang Anghel ng mga kabundukan upang ipag-utos mo rito ang anumang naisin mo.” Ang sabi naman ng Anghel ng mga kabundukan: “ O Muhammad kung nais mo ay iipitin ko sila ng Al-Akhshaban.” Ang Al-Akhshaban ay ang dalawang bundok na nakapalibot sa Makkah. “Datapwa’t ang hangad ko ay magpaluwal si Allah buhat sa kanila ng mga salinlahing  ang sasambahin ay si Allah lamang at hindi magtatambal  ng anuman sa  kanya,” tugon ng Sugo(SAS) sa Anghel.

 

Ang isa sa mga pinagdidiinan ng mga Mushrik*  sa Sugo ni  Allah (SAS0 ay ang kanilang kahilingan sa kanya na magbigay ng mga himala. Ang layunin ng kanilang paghingi ng himala ay ang pabulaanan ang kanyang pagkapropeta dahil ang buong akala nila ay hindi makapagbibigay ng himala ang  Sugo (SAS). Naulit ng maraming beses ang  ang kahilingang iyon buhat sa kanila. Minsan ay hiniling nila sa kanya na biyakin sa dalawang bahagi ang buwan. Hiniling naman ng Propeta sa kanyang Panginoon ang gayon. Kaya naman nakita nilang ang buwan ay nahati sa dalawang bahagi. Matagal-tagal din naman na nakita ng mga Quraysh ang himalang ito ngunit hindi pa rin sila sumampalataya, sa halip ay kanilang sinabi: “Isinailalim niya kayo sa kanyang kapangyarihan.” “Kung naipasailalim niya kayo sa kanyang kapangyarihan, hindi niya kayang maipasailalim sa kanyang kapangyarihan ang lahat ng tao kaya’t hintayin ninyo ang mga manlalakbay,” sabi ng ilan sa kanila. Pagdating ng mga manlalakbay ay tinanong nila ang mga ito.  “Oo nakita namin iyon,” sabi naman ng mga ito. Ngunit sa kabila niyon ay nagmatigas pa rin ang mga Quraysh sa kanilang kawalan ng pananampalataya. Itong pagbiyak ng buwan ay para bagang isang paunang himala sa himalang mas malaki pa rito. Ang malaking himala ay ang Al-Isra’ wa Al’Mi’raj.

 

Al-Isra’ wa Al-Mi’raj

 

Ang AL-Isra’ wa Al-Mi-raj ay ang paglalakbay sa Gabi at ang Pag-akyat sa langit ng Sugo (SAS). Matapos  na makabalik si Muhammad (SAS) buhat sa Ta’if, matapos ang mga pangyayaring naganap sa kanya sa bayang iyon, matapos na yumao si  Khadeejah (RA) kasunod ng pagyao ni Abu Talib, matapos na mag-ibayo ang pamiminsala ng mga Quraysh, at matapos na napuno na ang dalamhati ng puso ng Sugo(SAS); kailangan namang maalo ang marangal na Propetang ito. Kaya noong  ika –27 ng buwan Rajab ng taon ding iyon samantalang  natutulog ang  Sugo ni Allah (SAS) ay pinuntuhan siya ni Anghel Jibreel (AS) dala ang  Buraq  na isang hayop na kahawig ng kabayo. Ang hayop na ito ay may mga pakpak  at mabilis  lumipad na animo’y kidlat. Pinasakay rito ng Anghel Jibreel ang Sugo (SAS) at dinala siya nito sa Bahay Sambahan sa Jerusalem sa Palestina. Mula roon ay  iniakyat ang Sugo sa  langit  at nakita niya roon sa langit ang dakilang mga tanda ng kanyang Panginoon. Sa langit iniatas ni Allah ang tungkuling magdasal nang limang ulit araw-araw. Pagkatapos niyon ay bumalik  siya sa Makkah  nang gabi ring iyon. Kinaumagahan ay  pumunta siya sa  Ka’bah at nagsimulang isalaysay sa mga taong naroon  ang nagyari. Lalo pang tumindi ang pagpapabula sa kanya ng mga di-mananampalataya. May ilang naroon ang humiling pa sa kanya na ilarawan ang bahay sa Sambahan sa Jerusalem. Ang layunin ng hiling na ito sa Sugo (SAS) ay upang pabulaanan ang kanyang pagkapropeta  sa pag-aakala nilang gumagawa lamang siya ng kuwento. Sinimulan niyang ilarawan ito ng masusi sa kanila. Ngunit ang mga pagtatanong na ito ay hindi pa sapat sa mga Quraysh. Sabi pa nila: “Nais naming may iba pang patunay.” Kaya’y ang sabi ng Sugo (SAS): “ May nasalubong ako sa daan na isang karaban na patungong Makkah.” Inilarawan niya iyon sa kanila  at sinabi sa kanila  kung ilan ang bilang ng  mga kamelyo sa karaban na iyon  at kung ano ang oras  ng kanilang pagdating. Nagsasabi ng totoo ang Sugo  ni Allah (SAS) ngunit itong mga di-mananampalataya  ay tuluyan ng naligaw sa katotohanan sanhi ng kawalan ng pananampalataya, kanilang katigasan ng ulo, at kawalan ng paniniwala. Kinaumagahan matapos ang gabi ng Al-Isra’ wa  Al-Mi’raj ay pinuntahan ni Jibreel (AS) ang Sugo (SAS). Tinuruan  niya ito kung papaanong isinasagawa ang limang  pang-araw-araw na pagdarasal at kung kailan ang mga takdang oras ng mga ito. Noong bago pa naganap ang  Al-Isra’ wa Al-Mi’raj, ang dasal ay binubuo lamang ng dalawang Rak’ah (Pagyuko) lamang sa umaga at dalawang Rak’ah din sa gabi.

 

Sa panahong ito, ang pinagtuunan ng pansin ng Sugo (SAS) ay ang mga nagsisidating  sa Makkah matapos na lalong lumaki ang pagtanggi ng mga Quraysh sa katotohanan. Nakikipagkita siya sa mga taong ito sa kanilang tinitigilan at sa mga  pook na kanilang tinutuluyan. Inaalok niya silang yumakap sa Islam at ipinaliliwanag niya ang katuruan nito. Ang tiyuhin naman na si Abu Lahab ay panay  ang sunod sa kanya upang bigyang-babala ang mga tao laban sa kanya at laban sa kanyang ipinangangaral. Minsan ay pumunta siya sa isang pangkat ng mga taong taga-Yathrib at inanyayahan niya sila sa Islam. Nakinig sila sa kanya at pagkatapos  ay nagkaisa silang sumunod sa kanya at maniwala sa kanya. Nakaririnig na noon pa man ang mga taga-Yathrib na ito buhat sa mga Hudyo na may isang Propetang  isusugo  at ang pagdating nito ay nalalapit na. Kaya noong sila ay anyayahan ni Propeta Muhammad (SAS), nakilala kaagad nila na siya ang  propetang  tinutukoy  ng mga Hudyo kaya naman dali-dali  silang  pumasok  sa  Islam. Ang sabi nila sa isa’t-isa; “ Huwag ninyong  hayaang  kayo ay  maunahan  ng  mga Hudyo sa pagpasok sa Islam.” Anim lamang sila ng taong iyon iyon ngunit nang sumunod na taon ay may labindalawang kalalakihang dumating at nakipagkita sa Sugo (SAS). Itinuro niya sa kanila ang Islam. Pagbalik  ng mga ito sa Yathrib ay pinasama ng Propeta (SAS) sa  kanila si Mus’ab bin ‘Umayr (RA) upang magturo sa kanila  ng Qur’an at upang linawin sa kanila ang mga patakaran ng Islam. Nagawang maimpluwensiyahan  ni Mus’ab (RA) ang lipunan ng Yathrib. Kaya’t nang si Mus’ab (RA) ay magbalik sa Makkah pagkalipas ng isang taon, may kasama na siyang  72 kalalakihan at dalawang babae buhat sa mga mamamayan ng Yathrib. Nakipagkita sa kanila ang Sugo (SAS) at nangako naman silang itataguyod ang Islam at isasagawa ang mga kautusan nito. Pagkatapos nito’y nagbalik sila sa Yathrib.

 

Ang Yathrib ay isang ligtas na kanlungan ng katotohanan at ng mga tagapagtaguyod nito. At nagsimula na ang paglikas doon ang mga Muslim. Subalit matatag  ang pasya ng mga Quraysh na pigilan ang mga Muslim sa paglikas. Kaya dumanas  na naman ang ilang mga Muhajir* ng sari-saring pasakit at pahirap.  Sa takot sa mga Quraysh, palihim na lumikas ang mga Muslim. Ang paglikas ni ‘Umar bin Al-Khattab (RA) ay isang halimbawa ng katapangan  at paghahamon sapagkat  isinukbit niya ang kanyang espada  at binibitbit ang kanyang pana  nang siya ay pumunta sa Ka’bah at magsagawa ng tawaf sa palibot nito. Pagkatapos nito ay nilapitan niya ang mga Mushrik at sinabi sa kanilang : “Ang sinumang nagnanais na gawing balo ang kanyang maybahay at gawing ulila ang kanyang anak ay sumunod sa akin sapagkat ako ay lilikas.” Pagkatapos nito ay lumisan siyang wala ni isa mang humarang sa kanya. Si Abu Bakr As-Siddeeq (RA) naman ay nagpaalam sa Sugo ni Allah (SAS) para lumikas na rin ngunit ang sabi sa kanya ng Sugo (SAS): “Huwag kang magdali nang harinawa’y magtatalaga si Allah  para sa iyo ng isang kasama.” Nang magsilikas na ang karamihan sa mga Muslim ay naging balisa na ang mga Quraysh sa nakikita nilang  paglikas, nagsanggunian sila at  napagkasunduang paslangin ang Sugo(SAS). Ang sbai ni Abu Jahl: “ Sa tingin ko’y mabuting kumuha tayo ng isang matipunong binata sa bawat angkan natin at atin silang bibigyan ng espada. Palilibutan nila sa Muhammad at tatagain ito ng sabay-sabay nang sa gayon ang pananagagutan sa kanyang buhay ay mahahati sa iba’t-ibang mga angkan. Kapag nagkagayon ay mawawalan na ng lakaw ang angkan ni Hashim (Angkan ni Muhammad [SAS] ) na kalabanin ang lahat ng tao.” Subalit ipinabatid na ni Allah sa  Kanyang marangal na Propeta (SAS) ang sabwatang iyon. Kaya’t nang nagbigay  na si Allah ng kapahintulutang lumikas  ay nagpakasunduan ng Sugo (SAS) at Abu Bakr (RA) na lumikas na. Kinagabihan aay hiniling ng Propeta  kay ‘Alee bin Abi Talib (RA) na matulog sa kanyang higaan  upang akalain ng gma tao na siya ay nasa bahay pa rin. Sinabi rin niya kay Alee (RA) na walang masamang mangyayari sa kanya.  Pagdating ng mga nakipagsabwatan  ay pinalibutan nila ang bahay  at nakita nila  si Alee (RA) sa higaan  kaya’t ang buo nilang akala ay si Muhammad (SAS) iyon.  Nagsimula silang maghintay upang kapag kapag ito ay lumabas, ay  susugurin nila ito  at papatayin. Lumabas ang Sugo (SAS) samantalang sila ay nakapaligid sa bahay. Wala silang kamalay-malay na sinasabuyan  niya ng alikabok  ang kanilang mga ulo sapagkat inalis ni Allah ang kanilang paningin kaya hindi siya namalayan. Pinuntahan niya si Abu Bakr (RA) at pagkatapos ay naglakad silang dalawa  ng mga limang milya at nagkubli sa yungib ng Thaur. Sa kabilang dako ang mga kabinataan  ng mga Quraysh ay naghihintay pa rin hanggang sa mag-uumaga. Kinaumagahan  ay si ‘Alee (RA) ang bumangon  sa higaan ng Sugo(SAS). Gayon na lamang ang kanilang pagkamangha at galit. Tinanong nila si ‘Alee (RA) tungkol sa Sugo (SAS) ngunit wala  siyang ipinaalam sa kanila. Binubog nila ito at kinalakadkad ngunit wala rin silang nalaman. Dahil dito’y nagpadala  ang mga Quraysh  ng mga manunugis  sa lahat ng dako at nagtakda sila ng gantimpalang  isandaang  inahing kamelyos sa sinumang makapagdadala  kay Muhammad. Tumindi ang pag-aalala ni Abu Bakr (RA)  sa Sugo ni Allah- buhay man o patay. Nakarating ang mga manunugis hanggang sa bukana ng yungib na anupa’t  kung sakaling ang isa sa kanila ay tumingin sa paa nito, tiyak na makikita nito  ang  Sugo ni Allah (SAS) kaya’t ang sabi nito sa kanya: “Abu Bakr, ano ang palagay mo sa dalawang  ang ikatlo ay si Allah . Huwag kang mag-aalala; si Allah ay kasama natin.” Hindi sila nakita ng mga naghahanap sa kanila.

 

Tatlong araw silang namalagi sa yungib bago sila lumisan patungong Yathrib. Mahaba ang daan na kanilang  nilakbay at ang init ng araw ay nakakapaso. Kinagabihan  ng ikalawang araw  ng kanilang paglalakbay ay naparaaan sila sa isang kubol. Nakita nila roon ang isang babaeng  kung tawagin ay Umm Ma’bad. Humiling silang dalawa sa kanya ng makakain  at maiinom ngunit wala silang matagpuan dito kundi isang payat na inahing tupa na sa kahinaan ay hindi makaalis para manginain. Hindi rin ito nilalabasan kahit isang patak na gatas. Nilapitan ng Sugo (SAS) ang tupa, hinipo ang suso nito, at saka ginatasan. Napuno ang malaking lalagyan kaya’t habang nakatayong walang tinag  ay takang-taka si Umm Ma’bad  sa kanyang nasaksihan. Uminon ang lahat hanggang sa mabusog. Pagkatapos  ay muling ginatasan ng Propeta (SAS) ang tupa  at muling napuno ang lalagyan. Iniwan nila ito kay Umm Ma’bad at nagpatuloy sila sa paglalakbay.

 

Matagal-tagal ring inaabangan ng mga mamamayan ng Yathrib ang pagdating ng Propeta (SAS). Araw-araw  ay naghihintay sila sa labas ng Yatrib. Sa araw ng kanyang pagdating  ay masaya siyang sinalubong ng mga tao. Tumuloy siya sa Quba’( isang lugar na malapit sa Yathrib) at apat na araw  na tumigil doon. Sa pagtigil niya roon ay itinayo niya ang panulukan ng Masjid ng Quba’. Sa ikalimang araw  ay lumisan siya patungong  Yathrib. Tinangka ng marami  sa mga Ansari na anyayahan ang Sugo (SAS0 na sa  kanila manuluyan at maparangalan  sa pagtanggap sa kanya bilang panauhin. Hinawakan nila ang  renda ng kanyang inahing kamelyo. Panay naman ang pasasalamat ng Sugo (SAS) sa kanila at nagsasabing: “ Hayaan ninyo siya (ang kamelyo) sapagkat may nag-uutos sa kanya.” Nang makarating na ang kanyang kamelyo sa lugar na di-naglaon ay pinagtirikan ng Al-Masjid An-Nabawee ( Masjid ng Propeta) ay lumuhod ito.

 

Ngunit hindi agad bumaba ang Sugo (SAS) hangga’t hindi ito  tumayo at lumakad  nang kaunti at saka lumingon at bumalik. Nang muli itong lumuhod Sa dati nitong pinagluluhuran ay saka pa lamang siya bumaba.

 

Sa Yathrib ay tumuloy ang Sugo (SAS) kay Abu Ayoob Al-Ansari (RA). Si ‘Alee bin Abu Talib naman ay nanatili pa nang tatlong araw sa Makkah matapos na umalis ang Sugo (SAS). Pagkaraan ng tatlong araw ay  lumisan siya papuntang Madinah. Kanyang naabutan ang Sugo (SAS) sa Quba’. Matapos na mabili ng Sugo (SAS) sa may-ari ng lupa ang lupang niluhuran ng kanyang kamelyo ay ipinatayo niya roon ang kanyang Masjid. Ginawa niyang magkakapatid ang  mga  Muhajir  at  ang mga Ansari. Ang kanilang pagkakapatiran ay ganito: gagawing kapatid ng bawat Ansari ang isang Muhajir na makikibahagi sa kanya sa kanyang pag-aari. Nagsimulang gumawa ng sama-sama ang mga Muhajir at ang mga Ansari. Kaya naman lalo pang tumibay ang bigkis ng kanilang pagkakapatiran.

 

Ang Labanan Sa Badr

 

Ang mga Quraysh ay may ugnayan sa mga Hudyo ng Yathrib. Ang mga Hudyong ito ay nagtangka sa simula pa na maghasik ng kaguluhan at pagkakahati-hati sa mga Muslim sa madinah. Ang mga Quraysh naman ay nananakot sa mga Muslim at nagbabantang sila ay lilipulin. Ganito pinaliligiran ng panganib ang mga Muslim – sa loob at sa labas. Dumating pa ang puntong hindi nagpapagabi ang mga Sahabah* nang walang dalang  sandata. Sa ganitong mapanganib  na mga kalagayan ibinaba ni Allah ang kapahintulutang makipaglaban. Kaya’t nagsimula ang Sugo (SAS) na magpadala ng mga tao upang subaybayan ang mga pagkilos ng kaaway.

 

Nagpadala  rin siya ng mga taong haharang sa mga karaban ng kalakal ng mga Quraysh upang gipitin sila at ipadama sa kanila ang panganib nang sa gayon ay gumawa sila ng kasunduang pangkapayapaan sa mga Muslim at hayaan  ang mga Muslim na malayang ipalaganap ang Islam at ipamuhay ito. Gumawa  rin ang  Sugo (SAS) ng ilang pakikipagkasunduan  at pakikipag-alyansa  sa  ilang mga lipi. Muli siyang nagpasyang harangin ang isa mga karaban  ng Quraysh. Humayo siya at 313 kalalakihan. Mayroon lamang silang dalawang   kabayo  at 70  kamelyo. Ang karaban ng mga Quraysh ay binubuo ng 1,000  kamelyo at pinamumunuan ni Abu Sufyan na may kasamang 40 kalalakihan. Subalit napag-alaman  ni Abu Sufyan ang pagsugod ng mga Muslim kaya nagpadala siya ng tao sa Makkah upang ipagbigay–alam sa kanila hinggil  sa bagay na ito at upang humingi sa kanila ng ayuda. Binago  ni Abu Sufyan (RA) ang kanyang daan. Pumunta siya sa ibang daan kaya hindi sila nahuli ng mga  Muslim. Sa kabilang dako, nakaalis na ang mga Quraysh na dala ang isang hukbo na binubuo ng 1,000 mandirigma matapos na kanilang mapag-alaman sa unang sugo ang nangyari. Subalit nang sila ay papunta na, nasalubong sila ng ikalawang sugo na ipinadala ni Abu Sufyan (RA) at sinabi sa kanilang ligtas na ang karaban. Hiniling nito sa kanila na bumalik na sa Makkah subalit tumanggi si Abu Jahl na bumalik. Ipinagpatuloy ng hukbo ang pagpunta sa Badr.   Nang mapag-alaman ng Sugo (SAS) ang pagsugod ng mga Quraysh, sinangguni niya ang kanyang Sahabah (RA).

 

Napagkasunduan nilang lahat na makipagkita at makipaglaban sa mga Quraysh. Umaga ng araw ng Biyernes noong ika-17 ng buwan ng Ramadan taong 2 A.H. nang magharap ang dalawang panig. Naging mainit ang kanilang labanan at  nagtapos sa pagwawagi ng mga Muslim at pagkamatay ng 14 shaheed* sa kanilang panig samantalang ang mga Mushrik naman ay namatayan ng 70 kalalakihan at nabihag ang 70 sa kanila. Nang mga sandaling nagaganap ang paghahamok ay yumao si Ruqayyah (RA) na anak ng Sugo (SAS) at maybahay ni ‘Uthman (RA). Namatay si Ruqayyah (RA) sa Madinah na kapiling ang kanyang asawa na si ‘Uthman. Hindi sumama si ‘Uthman sa labanan sa Badr dahil na rin sa kahilingan ng Sugo (SAS) na siya ay manatili sa piling ng kanyang maysakit na maybahay. Pagkatapos ng labanan ay ipinagkaisang –dibdib ng Sugo (SAS) kay ‘Uthman ang kanyang ikalawang anak na si Zaynab (RA). Kaya dahil  dito ay tinagurian si Uthman (RA) na Dhunoorayn (ang nagtataglay ng dalawang liwanag ) sapagkat  napangasawa niya ang dalawa sa mga anak ng Sugo (SAS). Pagkatapos ng lababan sa Badr ay nagbalik sa Madinah ang mga Muslim. Masaya  sila sa tagumpay na kaloob ni Allah. Sa pagbalik nila ay may dala silang mga bihag at mga nasamsam na ari-arian ng mga kaaway. May  mga bihag na tumubos  sa kanilang sarili at mayroon din naman sa kanilang pinalaya nang walang kapalit na pantubos. Ang pantubos sa kalayaan ng iba sa kanila ay ang pagtuturo ng pagbasa at pagsulat sa mga sampung mga anak ng mga Muslim.

 

Matapos ang labanan sa Badr ay may mga labanan pang namagitan sa mga Muslim at mga mamamayan ng Makkah. Ang ikalawang  labanan  ay ang lababan sa Uhud. Sa labanang ito ay nanalo ang mga Mushrik laban sa mga Muslim. Ang mga taga-Makkah sa mga sumugod ay binubuo ng 3,000 mandirigma samantalang ang mga Muslim ay binubuo  lamang ng humigit kumulang sa  700 mandirigma.  Pagkatapos ng ikalawang  labanan  na ito ay may isang pangkat ng mga Hudyo na nagsadya sa Makkah at inudyukan ang mga tagaroon  na salakayin ang mga Muslim sa Madinah. Nangako pa silang  tutulong at magbibigay ng ayuda. Tinugon  naman ng mga taga-Makkah ang udyok. Inudyukan din ng mga Hudyo ang iba pang lipi na salakayin din ang mga Muslim. Pinaunlakan din ng mga  lipi  ang  udyok  ng  mga Hudyo. Kaya’t buhat sa lahat ng dako ay nagsimulang  sumugod ang mga Mushrik papuntang Madinah hanggang sa magkatipon  ang humigit-kumulang sa 10,000 mandirigma. Nalaman na ng Sugo (SAS) ang mga pagkilos ng mga kalaban. Sinangguni niya ang kanyang mga Sahabah kaya’t nagmungkahi  sa kanya si Salman Al-Farsee (RA) na gumawa ng  hukay sa palibot ng Madinah sa dakong walang mga  bundok. Lumahok ang mga Muslim sa paghuhukay  hanggang sa matapos ng mabilis. Sa loob halos ng isang buwan ay hindi matawid ng mga Mushrik  ang hukay. Hindi naglaon ay nagpadala si Allah ng malakas na hangin na bumuwal sa kanilang mga kubol. Dahil dito ay nalipos sila ng takot at dali-daling  lumisan pabalik sa kanilang bayan.

 

Ang Pagsakop Sa Makkah

 

Noong taong  8 A.H. ay nagpasya  ang Sugo  (SAS) na salakayin ang Makkah at sakupin ito. Lumisan siya noong ika-10 ng Ramadan ng nabanggit na taon kasama ang 10,000 mandirigma. Napasok niya ang Makkah ng walang matinding labanang naganap sapagkat sumuko  ang mga Quraysh at pinagwagi ni Allah ang mga Muslim. Matapos ang mapayapang pagsakop sa Makkah ay nagsadya  ang Propeta (SAS) sa Ka’bah, nagsagawa ng Tawaf sa palibot nito, at nagdasal ng dalawang Rak’ah sa loob ng Ka’bah . Pagkatapos niyon ay binasag niya ang lahat ng mga diyus-diyusan na nasa loob ng Ka’bah. Pagkatapos  nito ay tumayo siya sa pintuan ng Ka’bah habang ang  mga Quraysh ay nakatipon at naghihintay sa kung ano  ang kanyang gagawin sa kanila. Nagsalita siya, “ O Kalipunan ng mga Quraysh, ano sa  inaakala ninyo ang gagawin ko sa inyo?,” tanong niya. “ Kung ano ang mabuti, kapatid na marangal na anak ng kapatid na marangal,” sagot nila. “ Humayo kayo; kayo ay malaya na ,” sabi niya sa kanila. Sa pangyayaring ito ay gumawa ang Sugo ( SAS ) ng pinakadakilang halimbawa  ng  pagpapatawad sa mga kaaway na nagpahirap,  pumatay sa kanyang mga kasamahan at  nanakit sa kanya at nagpalayas sa kanya sa kanyang bayan.

 

Ang Pagyao ng Sugo (SAS)

 

Matapos na masakop  ang Makkah ay pumasok ang mga tao sa Islam ng pulu-pulutong. At noong taong 10 A.H. ay nagsagawa ang Sugo (SAS) ng hajj. Ang hajj na ito ay ang nag-iisang hajj na isinagawa ng Sugo (SAS). Kasama niyang nagsagawa ng hajj ang mahigit na isandaang-libong tao. Matapos na maisagawa ang hajj ay nagbalik ang Sugo sa Madinah. At pagkalipas ng humigit-kumulalng sa dalawang buwan at kalahati ay nagsimula ang karamdaman ng Sugo ni Allah ( SAS). At sa paglipas ng mga araw ay lalo pa itong lumalala. Nang nanghina na siya para pamunuan ang mga tao sa pagdarasal , hiniling niya kay Abu Bakr (RA) na ito ang mamuno sa mga tao sa pagdarasal. Araw ng Lunes ika-12 ng buwan ng Rabee’ul Awal taong 11 A.H. nang bawiin ng kataas-taasan ang buhay ng Sugo (SAS). Ganap na animnapu’t tatlong gulang nang siya ay yumao. Nakarating sa mga Sahabah ang pagyao ng Sugo (SAS). Halos mawalan sila ng malay at hindi makapaniwala sa balita. Kaya tumayo si Abu Bakr AS-Siddeeq (RA) sa gitna nila at nagsalita upang panatagin  sila at linawin sa kanila na ang Sugo (SAS) ay isang tao lamang, na siya ay namatay  kagaya ng pagkamatay ng karaniwang tao. At napanatag naman ang mga tao. Pinaliguan, binalot, at inilibing ang Sugo(SAS) sa silid ng  kanyang butihing maybahay na si A’isha (RA). Pagkatapos ng libing ay pinili ng mga Muslim si  Abu Bakr AS-Siddeeq (RA) bilang  Khaleefah (pinuno) ng mga Muslim. Siya ang una sa mga napatnubayang khaleefah (Khulafaa ur-Raashideen). Ang Sugo (SAS) ay 53 taong nanirahan sa Makkah: 40 tao bago naging Propeta at 13 matapos naging Propeta. 10 taon siyang nanirahan sa Madinah.

 

Ilan Sa Kanyang mga Himala

 

Ang pinakadakila niyang himala ay ang Banal na Qur’an na dumaig sa lahat ng mga mahusay sa wikang Arabik. Ito rin ay naglalaman ng hamon ni Allah sa lahat na magbigay ng sampung surah na katulad nito o magbigay ng isang surah  o kahit isang talata  na lamang  na katulad ng sa Qur’an. Saksi ang mga Mushrik sa kawalan ng kakayahang gawin ito. Hiniling sa kanya ng mga Mushrik  na siya ay magpakita ng himala  kaya naman nakita nila ang pagkabiyak ng buwan. Nabiyak  ang buwan hanggang sa ito ay maging dalawang bahagi. Ilang ulit ding bumukal ang tubig sa pagitan ng kanyang mga daliri. Nagpuri ang maliit na bato sa kanyang palad. Nagpatuloy ito sa pagpupuri matapos na mailagay sa palad ni Abu Bakr (RA), at pagkatapos ay sa palad ni ‘Umar (RA), at pagkatapos ay sa palad ni ‘Uthman. Madalas nilang marinig na nagpupuri ang pagkain habang siya ay kumakain. Bumati sa kanya ang mga bato at mga punongkahoy  noong ginawa siyang Propeta. Kinausap siya ng braso ng tupang may lason na ibinigay sa kanya ng isang babang Hudyo na nais siyang patayin sa pamamagitan ng  lason. Nang hiniling sa kanya ng isang Arabiano na taga-disyerto na pakitaan niya ito ng himala  ay inutusan niya ang isang punongkahoy  na lumapit sa kanya. Lumapit naman ito at pagkatapos ay inutusan niya itong bumalik sa kinaroroonan nito. Nang dinama niya ang suso ng inahing tupa na walang gatas  ay nagkaroon ito ng gatas. Ginatasan  niya ito at uminon siya at si Abu Bakr (RA). Nilawayan  niya ang dalawang mata ni ‘Aee bin Abi Talib (RA) ng mga ito ay namaga at hindi naglaon ay gumaling ang mga ito. Nasugatan ang isang lalaki sa mga Sahabah niya. Hinipo niya ang tama  at kaagad  namang gumaling ito. Dumalangin siya para kay Anas bin Malik(RA) na ito ay magkaroon ng mahabang buhay at maraming  yaman at anak at pagpalain ito ni Allah sa  mga  ito. Nagkaroon  ito  ng 120 anak , ang mga puno nito ng datiles ay dalawang  beses  nagbubunga sa isang taon  bagaman alam na ang datiles ay isang beses lamang kung magbunga sa isang taon, at nabuhay ito ng 120 taon.  Idinaing sa kanya ang tagtuyot habang siya ay nasa pulpito ng Masjid kaya nanalangin siya kay Allah. Nang mga sandaling iyon ay walang kaula-ulap sa langit ngunit dahil sa kanyang panalangin ay may namuong mga ulap na katulad ng bundok.

 

Bunuhos ang napakalakas na ulan sa sandaling iyon hanggang sa sumunod na Biyernes kaya may dumaing  naman sa kanya sanhi ng  dami ng ulan. Nanalangin na naman siya kay Allah at tumigil naman ang ulan. Lumabas ang mga tao at naglakad sa ilalim ng sikat ng araw. Pinakain niya ng humigit –kumulang  sa tatlong kilo ng trigo  at isang tupa ang mga taong  dumalo sa paghuhukay  ng kanal na ang bilang ay umabot sa isang libo.Nabusog silang lahat  at umalis  na ang pagkain ay parang hindi nabawasan. Pinakain niya rin ang mga taong ito ng kaunting datiles  na dinala ng mga babae ni Basheer bin Sa’d (RA) na para lang sana sa ama at tiyuhin nito. Pinakain din niya ang buong hukbo ng  baon ni Abu Hurayrah (RA) hanggang sa mabusog ang lahat. Lumabas siya sa kanyang bahay habang sa palibot nito ay may isang daang Quraysh na naghihintay sa kanya upang patayin siya. Hinagisan niya ng alikabok ang kanilang mga mukha  at siya ay umalis na hindi nila nakikita. Sinundan siya ni Suraqah bin Malik (RA) upang patayin siya. At nang malapit na ito sa kanya ay nanalangin siya laban sa kanya  kaya lumubog sa lupa ang mga paa ng kabayo nito.

 

Ilan Sa Kanyang mga   Katangian

 

Tungkulin ng mga Muslim na malaman ang pagkatao ng marangal na Sugong ito ni Allah (SAS) upang humatol sila ayon sa Qur’an na ipinahayag sa kanya, upang tularan nila ang kanyang pag-uugali at upang pahalagahan nila ang pag-aanyaya sa pagsampalataya sa isang Diyos na siyang  pangunahing mensahe ng kanyang pagka-Propeta batay sa sinabi ni Allah: “ Sabihin, ‘Ako ay nag-aanyaya sa aking  Panginoon at hindi nagtatambal sa Kanya ni isa man.’”  ( 72 :20 )

 

Siya ang kahuli-hulihan sa lahat ng mga Propeta. Sinabi pa niya: (SAS): “sa lahat ng mga Propeta, ako ang may pinakamaraming taga-sunod sa araw ng pagkabuhay at ako ang unang kakatok sa pintuan ng Paraiso.” Nakikilala siya sa pamamagitan ng mabangong halimuyak, kapag siya (SAS) ay dumating. Ayon sa sinabi ni Abu Hurayrah (RA): “Nagdarasal  siya (SAS) noon sa kalaliman ng gabi hanggang sa mamaga ang kanyang dalawang paa (dahil sa katatayo  habang nagdarasal). Kaya’t may nagsabi sa kanya , ‘O Sugo ni Allah, ginagawa mo pa ito samantalang pinatawad ka na ni Allah sa nauna at darating mo pang kasalanan?’ Ang sagot naman niya, ‘ Hindi ba’t dapat lamang na ako’y maging mapagpasalamat na lingkod?’ ” Ayon sa sinabi ni ‘Amr bin Al-Harith (RA): “ Sa pagkamatay ng Sugo (SAS) ay hindi siya nag-iwan ng deenar ni dirham, ng lalaking alipin  ni babaeng alipin, wala kahit  anuman kundi ang kanyang  puting  babaeng buriko  na dati niyang sinasakyan, ang kanyang sandata, at isang kapirasong lupa na ginawa niyang kawanggawa para sa mga  manlalakbay na kinapos ng panggastos habang nasa daan.” Sinabi ng  ‘Umar bin Al-Khattab (RA): “Nakita ko ang Sugo ni Allah (SAS) na namimilipit sa gutom. Ni masamang uri ng datiles na mailalagay niya sa kanyang sikmura ay wala siyang  makita.” Ayon sa sinabi  ni A’isha (RA): “ Hindi pinagbuhatan ng kamay ng Sugo ni Allah (SAS) ang sinuman maging ito ay babae  o isang utusan. Maliban na lamang sa kanyang pakikibaka alang-alang kay Allah. Walang anumang kapinsalaang kanyang nalasap  na pinaghigantihan niya ang gumawa nito. Maliban na lamang kung ang kabanalan ni Allah ay nilalabag sapagkat siya ay naghihiganti para kay Allah.” Ang sabi niya  (SAS): “ Ang pinakamahal sa mga lingkod ni Allah para kay  Allah  ay ang may pinakamagandang –asal sa  kanila.”

 

Ang Pag-aanyaya niya Sa mga Hari at Pinuno

 

Nagpadala ang Sugo ni Allah (SAS) ng kanyang mga sugo sa mga hari at mga pinuno ng iba’t-ibang bansa upang anyayahan sila sa  Islam.  Isinugo niya si ‘Amr bin Umayyad Ad-Damaree  sa Najashi, ang Hari ng Ethiopia. Ang pangalan ng Najashi  ay As’hamah. Nang dumating ang liham na dala ng Sugo ng Propeta (SAS) ay hinalikan  ito ng  Najashi sapagkat bago pa man dumating ang sugo ay  pumasok na siya sa Islam. Ipinahayag niya ang kanyang pagpasok sa Islam kay  Ja’far bin Abi Talib (RA). Isinugo ng Propeta (SAS) si Dihyah bin Khaleefah Al-Kalbee sa Qaysar, ang Emperador ng Byzantine.  Ang pangalan ng Qaysar  na ito ay  Hiraql (Heraclius). Nagtanong ang Qaysar ng tungkol sa pagkatao ng Propeta (SAS). At nang masabi sa kanya  ay natanggap niyang tunay  ngang Propeta  si Muhammad (SAS). Nagkaroon siya ng hangaring pumasok sa  Islam ngunit hindi sumang-ayon sa kanya ang kanyang nasasakupan. Sa takot niyang maalis sa kapangyarihan ay hindi siya pumasok sa Islam. Isinugo naman ng Propeta (SAS) si Hudhafah AS-Sahmee sa Kisra, ang Emperador ng Persia. Nang mabasa ng Kisra ang sulat ng Propeta (SAS)  na naglalaman ng paanyaya sa kanya na pumasok sa Islam ay ginutay-gutay niya ang sulat.  Nang  ito ay malaman ng Propeta (SAS) ay sinabi niyang ‘Nawa’y gutay-gutayin ni Allah ang kanyang kaharian.” At ginutay-gutay nga ni Allah ang kanyang kaharian. Isinugo ng Propeta (SAS) si Hatib bin Abi Balta’ah Al-Lakhmee kay  Al-Muqawqis, ang  Hari ng Alexandria  at  Egipto. Maganda ang itinugon niya ngunit hindi siya pumasok aa Islam. Iniregalo niya sa Propeta  (SAS) Si Maria Al-Qibtiyah. Isinugo ng propeta (SAS) si ‘Amr bin Al-‘Ass sa dalawang hari ng Oman na sina Jayfar at ‘Abd na mga anak ni Al-Julandee. Pumasok at sumampalataya sa Islam ang dalawang hari. Isinugo ng Propeta (SAS)  si Saleet bin ‘Amr  Al-Amiree kay Hawdhah bin ‘Alee Al-Hanafee ng Yamamah. Ang Yamamah  ay siyang Riyadh  sa ngayon. Hindi ito pumasok sa Islam dahil hindi pinagbigyan ng Propeta  ang kahilingan nito. Ang kahilingan nito ay ang makihati sa pamumuno ng Propeta (SAS). Isinugo ng Propeta (SAS)  si Shuja’ bin Wahb Al-Asadee kay Al-Harith bin Abi Sahamir Al-Ghassanee na hari ng Al-Balqa’  na isang bahagi ng Sham. Ayon kay Shuja ay ibinigay niya ang sulat sa haring ito habang ito ay nasa Damascus. Binasa nito ang  liham ngunit itinapon matapos mabasa. Sinabi pa ng hari na kasama ng hukbo nito ay pupuntuhan nito ang Propeta upang makidigma sa kanya. Marubdob ang kanyang hangaring gawin ito ngunit pinigilan siya ng Qaysar. Isinugo ng Propeta (SAS) si Al-Muhajir bin Abi Umayyah  Al-Makhzoomee kay Al-Harith Al-Himyaree na isa sa mga hari ng Yemen. Hindi pumasok sa Islam ang haring ito. Isinugo ng Propeta si Al-‘Ala’ bin Al-Hadramee kay Mundhir bin –Sawee Al-‘Abdee na  hari ng Bahrain. Dala ng  sugo ang liham na nag-aanyaya sa haring ito na pumasok sa Islam. Sumampalataya at pumasok sa  Islam ang  haring . Isinugo ng Propeta (SAS)  sina  Abu Musa Al-‘Ash’aree  at Mu’adh bin Jabal Al-Ansaree (RA) sa buong Yemen. Pinapunta sila roon upang ipalaganap ang Islam. Pumasok sa Islam ang karamihan sa mga mamamayan ng Yemen at ang mga hari nito.

 

Ang mga Napatnubayang  Khaleefah

 

Nagsimula ang panahon ng mga napatnubayang Khaleefah  pagyao ng Sugo (SAS) at nagtagal ng 30 taon. Apat sa malalaking sahabah ang sunod-sunod na namuno sa sambayanang Muslim at nangalaga sa  Pananampalatayang Islam. Ang layunin ng bawat  isa sa mga napatnubayang Khaleefah ay ang paglingkuran ang Islam at itaguyon ang kapakanan ng ng Sambayanang Muslim. Itinuturing na ang kapanahunan ng mga napatnubayang Khaleefah ang siyang ideyal na larawan ng bansang maka-Islam. Ito ay sa kadahilanang ang mga napatnubayang Khaleefah ay sumunod sa patnubay ng Sugo (SAS) at siya  ang kanilang tinularan. Itinaguyod din sa kanilang pamamahala ang mga katuruan ng Banal na Qur’an  at Sunnah ng Propeta (SAS).

 

Ang Unang Khaleefah

 

Siya ay si Abu Bakr As-Siddeeq (RA). Isinilang